我知道一旦做咗后备，就永远当做唔到正选。但系我认为后备应该系第二位，虽然无法与第一位比，但起码要比其他朋友地位高。如果作为后备，连一啲“一人之下，万人之上”嘅感觉都冇，咁呢个后备就白做喇。虽然话选择咗做后备就冇谂过付出咗嘅感情会有回报，但系如果付出咗连最基本嘅回应都冇咁就会好失落喇。
你讲得啱，做后备系唔使对方允许嘅。但系世上好少人可以唔使任何付出就得人哋嘅奉献嘅，至少我做唔到咁伟大。喺过去一段好长嘅时间，我都以为系做紧你嘅后备，但系我却冇做第二位嘅感觉，因为我连你一啲基本嘅情况我都唔知道。作为后备嘅我已经付出咗我对你嘅关心，冇资格亦冇必要反复问你嘅情况，呢啲唔系后备呢个角色嘅演份，你钟意讲我乐意听，你唔想讲我唯有乖乖做翻一个后备。
你讲得啱，机会唔系要你畀嘅，只系我放弃咗啫。因为我觉得好癐，我冇谂过做后备都会系咁辛苦嘅。虽然冇做正选嘅嗰份责任，但系就多咗份莫名嘅孤独感。身为后备就必须有义务分担对方嘅烦恼，却冇权力去分享对方嘅快乐。呢个就系后备嘅角色要求，冇办法接受就只有放弃。
不过宜家讲再多都系冇用，都已经过去咗喇。朋友，依然系朋友，一世嘅朋友，只系爱嘅方式唔同咗。